“Oh, bongiornu dutturi !”
“Bongiornu a vui, nc’è ‘a seggia,
venistuvu pi’ duluri ?”
“Ndaju la gula nfiammateddha,
e lu cori non m’arranca,
nta la testa ndaju ‘nu sbandu
e la panza chi m’ambranca,
nta li vini fuj lu sangu,
va fujendu com’on fiumi
di li peri…nzin’a testa,
non si queta…eccitazziuni
pari rrota chi mi pista…
Malatia è di staggiuni ?
Mu vardati ‘u cannarozzu ?
Su’ sicuru…c’un limuni
e ‘nu pocu i sali rossu…
passa tuttu lu brusciuri,
s’arrinfrisca a guliceddha,
s’arriggetta lu duluri
e s’astuta la fiammeddha.
Eu su’ ‘n’vecchiu fumaturi
e mi sparmu i sigaretti…
Megghiu è mi vi lu ricu
chi mmi piacinu i purpetti.
Non rinnegu mancu ‘u vinu
supr’a carni di majali,
frittuleddhi i rassu finu
nto me pranzu su’ normali.
Quattru ruppa i satizzeddhi,
ccumpagnati i mulingiana,
cacchi gghjunta i pipareddhi
nta pareddha…a’ rriggitana.
Prim’i tuttu i maccarruni
cu’ lu zzucu di la crapa…
speci oj ch’è di staggiuni
e la fami non…si placa.
E la scenza chi mi rici ?
Vinni cca’ pa’ ricetteddha,
chi cu’ vvuj simu’ ddu amici,
mi mi rati ‘a…pinnuleddha.”
“Su’ la scenza e v’arrispundu…
A rriggetta non va’ fazzu,
ma ‘n cunzigghiu vi lu dugnu
pirchi siti stortu e pacciu…
si ‘sta cura vuj cercati,
rivurgitivi ‘o spitali…
nto rripartu ri scassati
chi malati su’ mentali.
Ropu i ddha, vu stabilisciu,
allertati ‘u Caviali,
iddhu ndavi i casc’i mortu
e v’appronta un funerali.
Ora parru eu d’amicu:
svacantativi ‘sta panza…
un cristeri r’acqua e citu…
e auguri…in abbundanza !”
Salvatore Marrari RC 3 Settembre 2014
